Dende o CILSGA queremos facer un pequeno repaso á nosa historia, xa que entre xornadas , reunións, cursos... levamos xa quince anos crecendo xuntos.

Como ben sabedes, a nosa asociación comezou a súa andaina grazas a un grupo de intérpretes galeg@s que pensaron que asociarse era necesario, e foi así que o 7 de xaneiro de 1995 crearon o CILSGA coma unha entidade sen ánimo de lucro que representaría ós ILSE/GI de Galicia.

Pouco a pouco foise incrementando o número de soci@s, xa que a partir do ano 1998 comezou na nosa comunidade a formación regrada a través do “Ciclo Formativo Técnico Superior en Interpretación da Lingua de Signos Española”, co que aumentou considerablemente o número de persoas tituladas e, polo tanto, os nosos asociad@s.

Foron anos duros de loita por darlle á nosa profesión un trato digno, pero como todo sacrificio ten a súa recompensa, e aínda que quede moito camiño por andar, conseguíronse logros importantes. Así, os ILSE/GI galegos, ademais de realizar servizos nos distintos eidos da vida cotiá das persoas xordas e xordocegas, posibilitando que éstas accedan á información en igualdade de condicións que as persoas oíntes, están tamén presentes en centros educativos con alumnado xordo dende o curso académico 2003/2004, como persoal da administración pública.

Por facernos unha idea de todo o traballo desenvolvido por CILSGA durante estes anos, recollemos aquí un resumo das actividades máis destacadas:

1995

• Creación do CILSGA.
• I Seminario Nacional de ILSES, organizado coa FAXPG (Federación de Asociacións de Persoas Xordas de Galicia).

1996

• I Encontro de profesionais e usuarios, organizado coa FAXPG.

1998

• I e II Curso sobre SSI, organizado por ILSE (Asociación Nacional de Intérpretes de LSE) en colaboración co resto de asociacións de ILSE/GI autonómicas.
• I Curso de Reciclaxe.

1998–2002

• Publicación periódica do R.I.C. (Revista Informativa do CILSGA).

1999

• I Curso de Técnicas de Relaxación.

2000

• Socio fundador e membro de pleno dereito de FILSE (Federación Española de Intérpretes e Guías-Intérpretes).

2001

• I Xornadas Galegas sobre interpretación da LSE.

2003

• II Xornadas Galegas sobre interpretación da LSE.

2004

• Convenio de colaboración con FILSE para a celebración do II Congreso de FILSE.
• Creación da páxina web do CILSGA.

2005

• III Xornadas Galegas sobre interpretación da LSE.

2006

• IV Xornadas Galegas sobre interpretación da LSE.

2007

• Obradoiro Xurídico.
• V Xornadas Galegas sobre interpretación da LSE.

2008

• Obradoiro sobre Xordocegueira.
• II Seminario Galego de ILSES e usuarios, organizado coa FAXPG.

2009

• VI e VII Xornadas Galegas sobre interpretación da LSE.
• Formación de novas comisións dentro da xunta directiva.
• Proxecto de reforma da páxina web do CILSGA.

Dende a nova xunta directiva do CILSGA queremos amosar o noso agradecemento a todas as persoas que traballaron aquí anteriormente. Intentaremos exercer as nosas funcións con responsabilidade e do mellor xeito posible, para seguir adiante coa ilusión e coas ideas coas que se iniciou o CILSGA.